Иванов се консултира за следните чекори

Консултации на претседателот, Ѓорге Иванов со првиот човек на Уставниот суд, Никола Ивановски за уставните одредби чија содржина е поврзана со доделувањето мандат за составување нова влада. Шефот на државата рекол дека ќе постапува во согласност со уставните одредби и исклучиво во интерес на државата и на граѓаните на Република Македонија. Во меѓувреме, нови реакции од партиите за политичката состојба.

Од ВМРО- ДПМНЕ бараат појаснување од Американската амбасада- дали нивната позиција партиите да ги продолжат разговорите за формирање на нова влада, значи дека САД сугерираат од Република Македонија и од партиите во парламентот да нема нови предвремени парламентарни избори и дали овој повик може да се толкува како официјален став на новата администрација во САД, партиите со постоечкиот распоред на силите од последните избори да состават нова влада?

ВМРО-ДПМНЕ бара од портпаролката на Европската комисија Коцјанчич да објасни врз која уставна основа, претседателот Иванов може да определи лидер за формирање на што е можно поширока влада. Одговорот да биде јавен, бара ВМРО-ДПМНЕ.

Од СДСМ, во соопштението по средбата на Заев со тројца амбасадори, германскиот, шведскиот и полскиот, велат дека било констатирано дека интерес на граѓаните и на Република Македонија е да се добие стабилна влада којашто ќе се насочи кон потребните реформи и кон евро-атлантските процеси и уште еднаш го повикаа претседателот Иванов да им го додели мандатот за формирање нова влада.

Тоа денеска го побара и Либерално-демократската партија, која е дел од коалицијата на СДСМ.

Се огласи и БЕСА. ДУИ нема капацитет да донесе каква било одлука, поради тоа што е во морална и политичка криза. Принципот „победникот формира влада со победникот“ им беше само алиби за споделување на власта на ВМРО-ДПМНЕ, а ДУИ не го почитуваше заедничкото залагање на албанците со тоа што ги отпочна преговорите со оваа партија- се вели во партиското соопштение.

Социјалистичката партија иницира изработка на сеопфатна платформа за одбрана на виталните интереси и ги повика сите партии да се вклучат во изготвувањето.

Британскиот амбасадор во земјава, Чарлс Гарет изјави дека партиите треба да работат на составување влада и да се спроведат реформите.

Вчера, кај претседателот Иванов на разговор за актуелната политичка состојба беше и евроамбасадорот Самуел Жбогар.

Во неделата на полноќ истече рокот што го имаше мандатарот, Никола Груевски да обезбеди парламенарно мнозинство и да состави влада. Не се постигна договор со ДУИ. Заев побара можноста да му се довери нему.

Миле Ристески