Доделени сертификатите за 33 теренски возила, донација од ЕУ
Доделени сертификатите за 33 теренски возила, донација од Европската унија, во вредност од 800 илјади евра. 31 се за потребите на Граничната полиција, а две за Центарот за управување со кризи. Целта е да се помогне во поефикасното справување со бегалската криза...
Деноноќно на границата кон Грција се македонските полицајци и војници, но и 120-те припадници на безбедносните сили од неколку земји на Унијата и од Србија. Целта е иста- запечатување на Западно- балканската рута. Со 31 теренско возило за граничната полиција, Брисел ѐ помага на земјава за менаџирање со кризата. Уште две, за транспорт на мигранти доби Центарот за управување со кризи.
Безбедносниот систем во регионот се соочува со различни предизвици, и затоа според вицепремиерот Адеми е потребна негова поскорашна евроинтеграција.
Помошта во возила во вредност од 800 илјади евра е дел од европската поддршка за владините институции на национално и на локално ниво. Македонија е пример на одбрана на европските вредности, изјави директорот на ЦУК, Буџаку.
Со ваква оценка е и еврокомесарот Хан, кој смета дека Македонија има активна улога во справување со илегалната миграција. За да се запре миграциската криза, лани Македонија ја продолжи вонредната состојба на северната и на јужната граница до јуни годинава.
Наташа Гркова- Петрушевска