Идниот месец се отвора Македонскиот изложбено- трговски дом во Москва

За еден месец во Москва ќе биде отворен Македонскиот изложбено-трговски дом, кој ќе функционира во рамките на „Фуд сити“, своевиден трговски град на површина од 90 хектари, во кој се сместени павилјони на повеќе од 30 држави. На тој начин македонските извозници на земјоделско-прехранбени производи ќе добијат можност за директен пристап до најголемите дистрибутери во Русија кои годишно пласираат над 1,8 милиони тони храна.

„На просторот на овој изложбено-трговски салон се предвидени 20 компании на почеток да имаат место. Тие ќе имаат организиран простор на кој ќе можат да ги постават своите производи. Во првата пратка што ќе ја испратат како примероци во организација на „Македонски дом“ заедно со „Фудсити“и „Евроазискиот деловен сојуз“ ќе може првата пратка да биде испратена без царина“, изјави Дејан Бешлиев-извршен директор на Македонско-руската стопанска комора.

Лани извозот на македонски прехранбени производи надминал 30 милиони евра, што според министерот Цветков е резултат најмногу на извозот на јаболка и домати. Русија е се поатрактивна извозна дестинација за нашите фирми, чиј експорт расте со стапка од речиси 73 насто.

„Тој инструмент што го обезбедуваат Евроазискиот деловен сојуз и Фудсити е голема помош за македонските извозници во Русија“, вели Роман Викторович Дунко, потпредседател на Московската стопанска комора.

„Во овој проект учествуваат 85 руски региони и околу 30 странски земји,вклучувајќи ја и Македонија.Се надеваме дека македонските производители ќе бидат заинтересирани за нашиот проект и ќе најдат дистрибутери за пласман на своите производи на пазарот“, изјави Виктор Тузарович Камболов, претседател на управата на „Евроазискиот деловен сојуз“.

Македонскиот изложбено-трговски дом е лоциран во комплексот „Фудсити“во кој оперираат 300 најголеми руски увозници на храна, а дневно го посетуваат 100 илјади купувачи кои месечно, во просек, пазарат 150 илјади тони прехранбени производи.

Свето Николовски