Попоски: Очекуваме непроменети позиции на Велика Британија за Македонија

Очекуваме непроменети позиции на Велика Британија за Македонија, му порачал шефот на македонската дипломатија Никола Попоски на Ален Данкан, британскиот министер за Европа и за Америка, на средбата во Скопје. Ова се однесува на односите на Македонија во регионот, на економската размена и на евроатлантските интеграции, со акцент на партнерскиот однос меѓу двете држави, соопштуваат од МНР.

Британскиот министер вчера се сретна и со претседателот на ВМРО-ДПМНЕ, Никола Груевски. Во разговорите е изразена загриженост поради актуелната политичка состојба во земјава, при што, според соопштението на ВМРО-ДПМНЕ, Груевски изјавил дека партијата е под голем притисок на членството, да не се дозволи нарушувањето на принципот победник со победник, според изборните резултати. Груевски, исто така рекол дека ќе се направи сѐ што е во нивна моќ, за да се задржат мирот и стабилноста, и дека преку неуставен закон се бара употреба на албанскиот јазик.

Потпретседателката на СДСМ, Радмила Шекеринска, на средбата со Данкан порачала дека е изнајден начин за употреба на албанскиот јазик во согласност со Уставот. Македонија треба да биде правна држава, рекла Шекеринска.

Денеска попладне, британскиот министер за Европа и за Америка, Ален Данкан има средба со претседателот на Република Македонија, Ѓорге Иванов.