Трамп го поддржа планот на Конгресот за укинување и замена на „Обамакер“

Американскиот претседател Доналд Трамп го поддржа планот на Конгресот за укинување и замена на „Обамакер“. Со новиот план Американците добиваат поголем избор на доктори и здравствено осигурување по пониски цени.

„Планот ги намалува трошоците, го зголемува изборот и конкуренцијата и обезбедува пристап кон здравствена заштита за сите Американци. Ова е план каде ќе можете да го избирате докторот и план за здравствено осигурување. Мислам дека ќе имаме голем успех. Тоа е комплициран процес, но всушност е многу едноставно, се нарекува план за добро здравје“, изјави претседателот Доналд Трамп.

Новиот план за здравствена заштита обезбедува осигурување на лица со хронични болести, за деца до 26 години, зголемен избор на осигурувања и намалување на трошоците.

„Целта на сето ова е здравствена заштита со пациентите во фокус, каде пациентите, семејствата и докторите прават медицински одлуки, а не федералната влада“, рече д-р Том Прајс, Секретар за здравство и човекови ресурси.

„Обамакер“ ќе се укине и замени во три фази. Првата фаза укинување започна, втората е разгледување на сите постоечки регулативи за здравствена заштита и третата предвидува нови регулативи што вклучува и намалување на трошоците за лекови.

Укинувањето на „Обамакер“ беше едно од главните изборни ветувања на американскиот претседател Доналд Трамп.

Ирина Гелевска, постојан дописник од Вашингтон за МРТ