Речиси 130 илјади вработени во јавниот сектор

Во јавната администрација работат речиси 130 илјади вработени во 1.291 институција запишани во државниот регистер. Просечната возраст е 45 години, според половата структура преовладуваат жените. Има минорен тренд на зголемување на вработеноста од само еден процент.

Министерката за информатичко општество и администрација Марта Арсовска- Томовска изјави дека Извештајот за 2016-та нуди сериозна анализа на обемот и структурата на вработените според пол, возраст, образование и етничка структура во јавниот сектор, како и анализа на организацијата на државата со класификација на институциите основани од државата.

Извештајот нуди анализа на структурата на податоците за 110.311 вработени во јавниот сектор, од кои жени се 59.111, а мажи 51.200, а просечната возраст изнесува 45,4 години. Извештајот не нуди податоци за структурата на 19.342 лица кои се вработени во АРМ, МВР и Агенцијата за разузнавање поради чувствителноста на податоците.