Македонците од Вашингтон со поддршка за иницијативата „За заедничка Македонија“

Македонците од Вашингтон се приклучија со поддршка за „Заедничка Македонија„. Повеќе генерации Македонци од Вашингтон се собраа пред Белата куќа со развиени македонски знамиња и повеќе пораки.

„Ја изразуваме нашата целосна поддршка за нашите браќа и сестри во Македонија. Да ја зачуваме нашата единствена татковина, нашата слобода и независност. Сега, кога сме свои на своето, нема да дозволиме никој друг да одлучува за нас, за нашата судбина и за иднината на нашите деца и внуци. Македонија е наша земја! Ова е наша битка! За Македонија одлучуваат Македонците и сите други лојални граѓани на Македонија, а не туѓинците и нивните јатаци“, изјави Милка Ковач, професор по македонски јазик.

Македонците од пред Белата куќа порачаа: „нашите татковци и дедовци не се бореа за денес некој друг да ни ја крои судбината. Ни оставија аманет кој не смееме да го заборавиме и држава која мораме да ја чуваме“.

„Отфрламе секакви уцени и ултиматуми од надворешни и внатрешни непријатели, кои треба да знаат дека Македонците не се дрво без корен, и дека нема да потклекнат пред заканите. И од овде, заедно со сите Македонци насекаде во светот, јасно порачуваме: Нема предавање! Нема повлекување!“, вели Ковач.

Собирот предизвика интерес и кај многубројните Американци кои беа во посета пред Белата куќа.

Македонците од Вашингтон и околината на собирот пред белата куќа дадоа поддршка за унитарноста на Република Македонија.

Ирина Гелевска, постојан дописник од Вашингтон за МРТ