Скопје доби зелен билборд за прочистување на воздухот
Во центарот на Скопје поставен зелен билборд за прочистување на воздухот. Иновативното решение за загадениот воздух има способност да неутрализира 240 тони јаглерод диоксид годишно, велат од невладината Еко- свест. Вакви инсталации има и во повеќе европски градови.
По Осло, Париз, Дрезден и Хонг Конг, Скопје и Тетово добија решение за загадениот воздух преку иновативната вертикална инсталација „City Tree“. Статистиката вели 90% од жителите на градовите ској ден дишат загаден воздух, што е причина за смрт на секој 7-ми човек во светот.
Конструкцијата е комбинација на нови технологии и сензори за собирање на податоци од важност за животната средина и климата со цел оптимално функционирање.
Првите две инсталации се обезбедени со поддршка од Амбасадата на Сојузна Република Германија и донации од македонските и странски компании.
Овој растителен филтер го компензира загадувањето од 417 автомобили на годишно ниво и може да се адаптира на секоја средина. Иако инсталацијата има ист ефект како 275 дрвја, сепак не може да ги замени, велат од невладините еколошки друштва.
Анита Никушева – Јованчев