Димовски на чело на Комисијата за избори и именување, собраниска седница в понеделник
По три дена преговори, партиите се договорија. Илија Димовски е избран за прв човек на Комисијата за избори и именување. Со тоа е одблокиран процесот за продолжување на конститутивната седница на Собранието.
Падна договор за претседател на Комисијата за избори и именувања. Ќе ја раководи Илија Димовски од ВМРО-ДПМНЕ. Токму претседателствувањето со Комисијата беше камен на сопнување на неколкудневните координации. Според Оливер Спасовски, СДСМ повторно направиле отстапка која е во корист на граѓаните и на државата.
„И покрај неразумното барање, прифативме претседателот на Комсијата да биде од ВМРО-ДПМНЕ со цел да почнат процесите во државата, а граѓаните и законодавниот дом да не бидат залжници“, рече Спасовски.
Доколку СДСМ, продолжи да го слуша гласот на граѓаните кои што се секојдневно на улиците и со ваквите постапки да прифаќа дека се губитничка партија на изборите, Собранието на Република Македонија ќе продолжи нормално да функционира- смета Илија Димовски.
„СДСМ денеска првпат по изборите го прифати фактот дека се губитничка партија. Претседателското место и шесте членови во Комисијата што ги доби ВМРО-ДПМНЕ не се добар гест од страна на СДСМ, туку се правила и пракса кои во Собранието функционираат 25 години“, нагласи Димовски.
В понеделник напладне се очекува продолжението на конститутивната седница на која треба да биде изгласан составот на Комисијата за избори и именување. Според договорот, во неа 6 члена ќе има ВМРО-ДПМНЕ, СДСМ 5, а по еден ДУИ и БЕСА.
Дали ќе се одржат локалните избори, според СДСМ е прашање за кое треба да се дискутира по завршувањето на конститутивната седница. Од ВМРО-ДПМНЕ сметаат дека локалните заедно со предвремените парламентарни избори треба да се одржат час поскоро.
Миле Ристески