Билт: Демократија, Устав и Европа- три работи кои ќе ја однесат Македонија напред

Клучот е во Уставот, без разлика дали станува збор за Македонија, Шведска или за Грција- поранешниот шведски премиер, Карл Билт рече дека е во извидничка мисија низ Балканот и дека со Паневропската невладина организација собира информации кои ќе ги пренесе на институциите во Брисел.

„Вообичаено доаѓаме и слушаме, ги сумираме фактите и потоа ги формулираме политичките препораки за оние кои ги носат европските одлуки. Денеска сме овде, вечер заминуваме за Белград, а потоа се враќаме дома. Постои голем ангажман околу Западен Балкан и прашањата за влез во ЕУ. Пристапот во ЕУ е едно од важните прашања во регионот. Важно е да се следат настаните за да можат да се формулираат препораките“, нагласи Билт.

По средбата со Билт, од СДСМ испратија соопштение во кое велат дека на гостинот му го пренеле нивниот став:

„Парламентарното мнозинство ја презема обврската да го деблокира демократскиот процес во парламентот согласно со Деловникот, Уставот и со законите. Брзо ќе биде избран новиот претседател на Собранието, а потоа и новата реформска влада. Тоа е одлука на мнозинството граѓани, изразена на кредибилни избори и сите институции во државата се должни да обезбедат мирен трансфер на власта. “

Од Бихаќка, Билт замина во Мала Речица. Лидерот на ДУИ, Ахмети, по средбата за новинарите рече оти неговата партија направила сѐ што е потребно и дека клучот за решението на кризата го имаат двете големи македонски политички партии.

„ДУИ ги направи сите свои обврски во формирањето на новото мнозинство. Ја дадовме нашата поддршка и правиме напори да се надмине кризата, но секако дека е потребно и олеснување од нашите пријатели и ќе видиме дали ќе рефлектираат страните, меѓутоа главната одговорност паѓа на големите македонски политички партии, СДСМ и ВМРО-ДПМНЕ. Тие да се надминат себеси и да го стават интересот на државата пред сопствениот“, рече Ахмети.

Работниот ден на швеѓанецот завршува со средби со лидерите на ВМРО-ДПМНЕ и со движењето БЕСА. Од кабинетот на претседателот Иванов информираа дека Билт побарал да се сретне и со Ѓорге Иванов, но агендата на шефот на државата не го дозволувала тоа.

Катерина Топалова