Дипломатски реакции: Насилството е неприфатливо

Турбулентната ситуација создадена вчера во Македонија, меѓу главните теми на неформалниот состанок на министрите за надворешни работи на ЕУ во Малта. Оттаму високиот претставник на ЕУ за надворешни работи и безбедносна политика Федерика Могерини со осуда за инцидентите.

„Она што синоќа го видовме во Скопје е многу загрижувачко и многу тажно за сите нас. Секогаш сметаме дека насилството е неприфатливо, особено кога се случува во храмот на демократијата, односно Собранието. Ние веруваме дека сите во Скопје треба да ги следат уставните принципи, демократијата и да се обидат да ја извлечат земјата од оваа сериозна криза, која може да биде опасна“, изјави Федерика Могерини.

Могерини и Хан синоќа испратија пораки за смиреност во земјава. Го честитаа изборот на спикер во Собранието. Слична порака пристигна и од Амбасадата на Соединетите Американски Држави.

Повик за смиреност пристигна и од тројката европратеници, Кукан, Вајгл и Фленкештајн кои побараа организаторите на инцидентите да бидат казнети.

„Ги повикуваме сите страни да се воздржат, да ги смират тензиите и да не употребуваат сила“, изјави генералниот секретар на Советот на Европа, Торбјорн Јагланд.

Организацијата на Обединетите нации соопшти дека со исклучителна загриженост го следат развојот на ситуацијата во Македонија и воедно повикаа на мир и воздржаност. „Насилството насочено кон демократските институции и избраните претставници на народот е неприфатливо“. Се повикуваат сите политички сили, преку демократски средства, да ги разрешат меѓусебните несогласувања, согласно со Уставот.

Загриженост за состојбата во земјава на социјалните мрежи изрази и генералниот секретар на НАТО, Јенс Столтенберг.

„Да се прифатат изборните резултати, да се спроведат, а одговорните во Скопје да се посветат кон Европа и делата“. Ова е пораката на германскиот министер за надворешни врачена во Берлин на амбасадорот на Република Македонија.

Владата мора да ги одржува и мирот и законот- вели германскиот шеф на дипломатијата во пишуваниот коментар за инцидентите.

Воздржување од сите страни и итно воспоставување на редот и мирот во земјата преку соопштение побараат и австрискиот министер за надворешни работи, Себастијан Курц и генералниот секретар на ОБСЕ, Ламберто Заниер.

Осуди за насилството и порака за загриженост пристигнаа и од регионот. Апелираат да се најде политичко решение за ситуацијата во земјава.

Од руското МНР повикаа да биде прекинат надворешниот притисок врз Македонија и да им се овозможи на одговорните политички сили во земјата сами да го определат натамошниот развој.

Катерина Топалова