Во нападот во Манчестер загинаа 22 лица, над 50 се повредени

Над 20 лица загинаа, а 50-ина се повредени во експлозија за време на концертот на американската пејачка Аријана Гранде во Манчестер. Нападот се третира како можен терористички акт. Според последните информации на полицијата, бомбаш-самоубиец го активирал експлозивот во фоајето на арената. Во тек е истрага за евентуални соучесници. Британскиот премиер Тереза Меј и лидерот на опозициската Лабуристичка партија Џереми Корбин ја прекинаа кампањата за предвремените парламетнрани избори.

„Ова е вараврски чин врз најранливата категорија на нашето општество, младите луѓе, децата кои присуствуваа на поп концерт. Сочувство до семејствата на жртвите. Граѓаните треба да бидат внимателни, но не и исплашени. Големиот Манчестер и порано бил цел на терористите, но душата на градот не им се покори. Нивната цел е да сеат страв и да не поделат. Но нема да успеат“, изјави Амбер Рад, министерка за внатрешни работи.

Иако Исламска држава официјално не презеде одговорност, џихадистите се огласија на социјалните мрежи. На Твитер напишаа: „Изгледа бомбите на британската Авијација врз децата на Мосул и Рака тукушто се вратија и паднаа во Манчестер.“

На Твитер се огласи и Гранде која им изрази сочувство на семејствата на загинатите. 

Сведоците велат дека слушнале и пукотници.

„Одевме кон погрешен излез, па тргнавме во друг правец. Тогаш слушнавме експлозија, почнавме да трчаме. Сите врескаа, плачеа, настана општ хаос.“

„Кога слушнавме за нападот, тргнавме кон Манчестер и им помагавме на сите кои немаа како да се вратат дома.“

На концертот на Аријана Гранде имало 20.000 луѓе. Арената на Манчестер, отворена од 1995-та година, е најголемата затворена арена во Европа којашто освен за спортски настани се користи и за концерти.

Маја Филдишев