НБРМ ја намали прогнозата- се очекува раст на БДП од 2,5%

Народната банка направи надолна корекција на проекцијата за растот на македонската економија. За годинава, наместо претходните 3,5 проценти раст на БДП, сега се очекува 2,5 проценти, а проекцијата за в година е корегирана од 3,7 проценти на 3,2 проценти.

Како главни причини се посочени политичката криза, како и надворешното окружување со Брегзитот и зголемувањето на каматните стапки од ФЕД.

„Главните претпоставки на априлските проекции се задржување на здравите фундаменти на домашната економија, продолжените негативни ефекти од политичката криза врз однесувањето и довербата на потрошувачите и инвеститорите, како и претпоставката за постепено разрешување на кризата во текот на годинава, стабилизирање на амбиентот и исцрпување на неповолните ефекти до крајот на годината“, изјави гувернерот Димитар Богов.

НБРМ има непроменети очекувања за нивото на инфлацијата споредено со октомври и очекува забрзување на растот на цените, односно инфлација од 1,3 проценти годинава и 2 проценти догодина.