Могерини и Хан го поздравија изборот на новата Влада

За изборот на новата Влада на Зоран Заев се огласи и меѓународната заедница. Високата претставничка за надворешна и безбедносна политика на Европската унија, Федерика Могерини и еврокомесарот за преговори за проширување Јоханес Хан, во заедничко соопштение го поздравија изборот на новата Влада.

„Европската унија е подготвена да ја поддржи работата на новата влада, како и опозицијата, за конструктивно спроведување на сите делови од Пржинскиот договор и на итните реформски приоритети“- се вели во заедничката изјава Могерини и на Хан.

Од Брисел велат дека очекуваат сите парламентарни партии да ги стават разликите настрана и со здружени сили да работат на заедничката реформска агенда, во корист на сите граѓани на земјава.

Могерини и Хан порачуваат дека е клучно земјава да се врати на европскиот пат, како што посакуваат и заслужуваат граѓаните.