Утврдени областите за итни реформи

Судството, медиумите, обезбедувањето независни професионални институции, функционалност на парламентот се клучните области во кои што се потребни итни реформи, заеднички заклучиле премиерот Заев и амбасадорите на земјите- членки на Европската унија, акредитирани во земјава. Дипломатите изразиле силна поддршка за посветеноста кон реформската европска агенда и за определбата Македонија да биде европска држава- пишува во владиното соопштение.

Посветени сме на дефинирање краткорочна и среднорочна агенда за ургентните реформски приоритети. За тоа ќе разговарам и со еврокомесарот Хан во Брисел. Евро-атлантските интеграции се стратегиска цел и интерес на граѓаните на Македонија е да добие демократски институци, рекол премиерот Заев пред евроамбасадорите.

По средбата во Владата единствено францускиот амбасадор со коментар. Вели дека Македонија е на вистинскиот пат.

„Зборувавме за евроинтеграциите, состанокот беше оптимистички и успешен. Земјата е на вистинскиот пат, а Франција ќе помогне што е можно повеќе за да бидат исполнети сите добри намери. Сите треба да работите на тоа и очекуваме позитивни чекори“, изјави амбасадорот Тимоние.

На средбата со дипломатите премиерот Заев нагласил подготвеност во интерес на граѓаните владата да соработува со опозицијата и со претседателот на државата, сѐ со цел развој на Македонија и квалитетен живот за граѓаните.

Миле Ристески