Кривичниот суд одлучува по барањата на СЈО
Oбвиненијата на СЈО веќе се доставени во судот и преку автоматската распределба на предмети се доделени кај судии кои треба да дадат оценка на обвинителните акти.
Сите обвиненија на Специјалното јавно обвинителство се примени во судот, а е познато и кои судии за кои предмети ќе одлучуваат. За барањата за определување на мерки за претпазливост и притвор ќе одлучуваат судиите од кривичните совети. Рокот за прифаќање или одбивање на барањата е 24 часа.
Со обвиненијата на СЈО се опфатени 94 лица и 7 фирми, а се бара притвор за 18 обвинети и мерки на претпазливост, односно одземање на пасошите за 47 лица.
Обвинетите во предметите се товарат за над 20 различни кривични дела, вклучувајќи злосторничко здружување, даночно затајување, злоупотреба на средствата за финансирање на изборната кампања, повреда на избирачкото право и уништување на изборен материјал.
Синоќа пред Кривичниот суд каде што се одлучува по барањата на СЈО за притвор и мерки на претпазливост, во предмети во кои се обвинети функционери на ВМРО-ДПМНЕ, се собраа граѓани и поддржувачи на партијата.
Очекуваат судот да донесе правична одлука. Велат, законите мора да се почитуваат, но тие да важат за сите подеднакво.