Изгаснат пожарот кај Матка, повеќе активни пожари низ земјава

Пожарот кај кањонот Матка е изгаснат. Четири екипи на Противпожарната бригадата, вработени во „Паркови и зеленило“ и авионите на Дирекцијата за заштита и спасување помогнале да се спречи ширењето на огнената стихија кон Водно. Активен пожар има и во атарот на Студеничани, на планината Жеден и Морани. И покрај застарените возила од Бригадата за противпожарната заштита, велат - подготвени се за интервенции. Дневно имаат по 20 повици.

Има индиции дека пожарот на Матка е подметнат, вели градоначалникот на Град Скопје, Коце Трајановски. Загрижува податокот што во краток период има многу жаришта. Состојбата се следи за да се намалат последиците.

Гори шума и сува трева во повеќе делови од Македонија, потврдуваат од Центарот за управување со кризи. Кај селото Требовље, огнената стихија дивее веќе две недели. Во реонот на Тетово активни се 2 пожара. Има и во Пелагониско кај Подвис, во Дреново, а оној кај селото Девич е со намален интензитет.

На седница на Владата беше истакнато дека институциите се на терен сѐ до конечно гасење и локализирање на пожарите. Беа преземени и обврски да се истражат причините за појава на зачестените пожари на повеќе локации низ земјата.

Сунчица Николоска