Околу 5.000 граѓани извршиле увид во Избирачкиот список во подрачните канцеларии на ДИК

Увид во Избирачкиот список за локалните избори во подрачните единици на Државната изборна комисија (ДИК) и во нивните канцеларии ширум земјата до вчера извршиле 4.579 граѓани. Граѓаните вршат увид во Избирачкиот список и преку веб страната на ДИК. Увидот, според Роковниот на ДИК, ќе трае до 9 септември на полноќ.

Денеска треба да заврши изборот на членовите на избирачките одбори од вработените во администрацијата за 80 општини што Општинските изборни комисии (ОИК) го вршат преку софтверот на ДИК. Политичките партии со освоени најмногу гласови на минатите избори, своите предлози за членови на избирачките одбори до ОИК треба да ги достават до вторник 29 август, поради викендот и празникот во понеделник.

Во подрачните единици и канцеларии на ДИК во тек е собирање потписи за независните листи за советници и за градоначалници. Рокот за собирање потписи за независните листи пред ДИК трае 15 дена и завршува на 4 септември.