Заев- Хан: Демократските процеси и реформи во Македонија важни за перспективите на целиот регион

„Продолжете да работите демократски на започнатите реформи. Тоа што ќе го постигнете е важно за песпективите на вашата држава и за целиот регион“- порачал еврокомесарот Јоханес Хан на средбата со премиерот Зоран Заев во Њујорк.

Како што соопшти владината прес-служба, Хан ги оценил иницијативите на Владата на Македонија за добрососедство и регионална соработка како корисни во процесот на интегрирање на целиот Западен Балкан во евро-атлантските интеграции.

Премиерот Заев нагласил дека Владата на Република Македонија е активно фокусирана на реализација на реформскиот План 3-6-9 и на потребните активности за остварување на стратешките евро-атлантски цели на државата.

„Ја заокружуваме првата фаза според предвидениот рок, до крајот на септември. Го имаме Извештајот на експертот од ЕУ, Прибе и неговите сугестии ќе бидат земени предвид во вториот дел од Планот на којшто веќе работиме. Нашата цел е да создадеме услови за квалитетен живот на граѓаните на Македонија и за евро-атлантските интеграции“, рече премиерот Заев.

Премиерот нагласил дека Владата очекува исчекор во европските интеграции на есен, преку тргање на условеноста на препораката, а потоа и датум за преговори, додавајќи дека ги  исполнуваме и потребните услови за интеграцијата во НАТО.

На средбата се разговарало и за отворените можности за напредок на Македонија на економски план, преку зголемениот интерес на домашните и странските инвеститори и придонесот што ќе имаат отворени евро-атлантски перспективи за економскиот развој на Република Македонија.