Шефовите на дипломатиите на Грција, Македонија, Албанија и Бугарија на средба во Солун

По иницијатива на грчкиот министер за надворешни работи Никос Коѕијас, денес и утре во Солун ќе се одржи средба на шефовите на дипломатиите на Грција, Македонија, Албанија и Бугарија.

Настанот е продолжение на неодамнешните контакти на Коѕијас со неговите колеги од регионот, за време на Генералното собрание на Обединетите нации во Њујорк, информираат од грчкото МНР.

Целта на дипломатската средба е да се потврди институционалната соработка за решавање на безбедносните прашања и за борбата против екстремизмот, тероризмот и радикализацијата. Истовремено, овие земји беа соочени и со голема бегалска и мигрантска криза, чии последици сѐ уште ги чувствуваат.

Министрите за надворешни работи ќе ги разгледаат можностите за подготвување заедничка позиција при решавање на тие прашања врз база на европските вредности и добрососедските односи.

Во делегациите се вклучени и министрите за внатрешни работи и за енергетика, односно економија на четирите земји.

Димитров претходно оваа недела изјави дека не очекува оти земјите од регионот, поточно Албанија и Бугарија, ќе бидат посредници во решавањето на спорот за името со Грција. Тој посочи дека спорот е билатрално прашање и оти ќе се решава меѓу двете земји со посредство на Обединетите нации, односно нивниот медијатор Метју Нимиц.

Тој истакна дека очекува на маргините на квадрилатералната средба да има и билатералка со Коѕијас.