Државниот инспекторат го презентира извештајот за состојбите на Клиниката за гинекологија

На скопска Гинекологија релативно лоши здравствено- санитетски услови. Државниот здравствен и санитарен инспекторат излезе со извештајот. Директорката се пожали на недостиг на кадар. Докторката во чие дежурство починаа четири новороденчиња, доби намалување на платата за 30 насто и работа под надзор од колегите.

„На одделението за интензивна нега и постинтензивна нега, за време на надзорот е констатирано дека има зголемен обем на работа, во однос на просторните и кадровските капацитети, како и во однос на опремата. Сместени се по две новороденчиња во еден инкубатор. Клиниката располага со капацитет од 25 новородени, а во време на надзорот, хоспитализирани се 49“, соопшти директорката на Државниот инспекторат, Ирина Бухова.

Како што соопшти директорката на Гинеколошко- акушерската клиника, Викторија Јовановска, многу е важна и динамиката на обновување на кадарот.

„Последниот анестезиолог е примен пред 15 години, така што анестезиолози, педијатри, интензивисти, неонатолози, не можеме да најдеме преку ноќ“, рече Јовановска.

Од почетокот на годината до 30-ти септември на Клиниката за гинекологија и акушерство во Клиничкиот центар во Скопје починале дури 127 новороденчиња.