Тевдовски: Македонската економија ќе закрепне и ќе почне да се движи напред

Политичката нестабилност го забави растот. Сепак, креаторите на политиките очекуваат дека ќе има стабилизација на економската активност. Министерот за финансии, Драган Тевдовски учествува на годишните средби на Светска банка и на ММФ.

„Министерството за финансии годинава имаше најконзервативна проекција на економски раст во споредба со релевантните институции како ММФ, додека за догодина тие се совпаѓаат, односно се проектира раст повисок од 3 отсто. Очекувањата се дека македонската економија ќе закрепне и ќе почне да се движи напред. Ние во моментот сме силно посветени на реформите, а приоритет на Владата се и евроатланските интеграции. Сметаме дека тие на среден рок ќе го интензивираат растот“, изјави министерот Тевдовски во интервју за „Гласот на Америка“.

Транспарентниот и чесен пристап на Владата, како и приближувањето кон НАТО ќе донесе дополнителни странски инвестиции во земјава. Активно се работи на проект за поврзување на домашни и странски компании од автомобилската индустрија со што ќе се обезбеди повеќе работа и домашните фирми, истакна министерот Тевдовски во интервјуто.