Иванов: ЕУ да покаже решителност- Македонија да добие датум за почеток на преговори

Одредување датум за почеток на преговорите за членство во Европската унија, уште еднаш во Брисел побара македонскиот претседател, Ѓорге Иванов. Неопходна ни е вашата решителност, нагласи Иванов, зашто според него, процесот е паралелен. Истовремено течат преговорите за членство, додека земјата ја усвојува и применува европската регулатива.

„Унијата треба да разбере дека процесот на проширување не е чисто техничко, туку пред се политичко и стратегиско прашање. Пораката до Унијата е да посвети поголемо внимание кон истокот и југоистокот на европа. Да го продолжи проширувањето, да инвестира во инфраструктурното и енергетско поврзување, да го отвори просторот. Бидејќи само солидарни можеме да градиме регион и континент на безбедност, мир и благосостојба“, нагласи претседателот Иванов.

Одложувањето на проширувањето на Унијата на Балканот и во Македонија, предизвика комбинација на економска и безбедносна криза, ранливост што овозможува однадвор аспирантите да бидат дестабилизирани. Конкурентноста на регионалниот за настап на глобалниот пазар, е помогната со иницијативата 16+1, рече претседателот.

„Иницијативата 16+1 што им овозможува на државите од Централна, Источна и Југоисточна Европа инфраструктурно да се поврзат, со што се комплетира европскиот проект за слободен проток на луѓе, стоки, услуги и капитал. Но, сето тоа ќе остане незавршено без третиот елемент, а тоа е проширувањето на Унијата“, рече Иванов.

Тој искажа благодарност до некои европски земји за помошта во справувањето со илегалната миграција. Според шефот на македонската држава, ова е пример што ЕУ треба да го прифати и спроведува.

Зоран Богатинов