Системски ќе се решава проблемот со загадувањето во Скопје

Системски ќе се решава проблемот со аерозагадувањето во метрополата. Според градоначалникот Шилегов, за 10 години во Скопје воздухот ќе биде чист. Во меѓувреме, најавени се краткорочни мерки- еколошко маркирање на возилата при технички преглед, намалување на цената на градскиот превоз и засилени инспекциски контроли.

„Градот Скопје, заедно со МВР, иницира законски измени со кои при техничкит преглед на возилата секое возило да може еколошки да се мапира и да добие налепница. Потоа градските власти ќе можат административно да ги исклучуваат возилата што реално придонесуваат за загадување на воздухот. Системот пар- непар е неправичен“, изјави скопскиот градоначалник, Петре Шилегов.

Тој појасни дека нема да има дополнителни финансиски импликации врз буџетот на граѓаните бидејќи и така секој граѓанин врши технички преглед во текот на годината. Разликата, како што рече, е што при мерење на издувните гасови, што некаде се спроведува, а некаде не, ќе може да се категоризира возилото, каква и колкава количина на издувни гасови има и согласно тоа да се мапира во еколошка смисла.

Шилегов потенцира дека ова е само идеја и оти треба да се доработи. Секое возило би требало да добие соодветна боја на налепница како постојните што ги имаме при регистрација на возилата.