Премиерот и министрите ќе одговараат на пратенички прашања

Пратенички прашања на дневен ред во Собранието. Премиерот Зоран Заев и министрите првпат по формирање на новата Влада ќе одговараат на прашањата на пратениците.

Седницата за поставување пратенички прашања Парламентот започнува да ја одржува по 100 дена од формирањето на Владата, но поради локалните избори таа беше одложена. Седницата, според Деловникот, се одржува секој последен четврток во месецот, но овојпат е поместена за петок имајќи ја предвид вчерашната меѓувладина седница на Македонија и на Бугарија во Струмица.

На седницата задолжително присуствуваат претседателот и членовите на Владата и други носители на јавни функции за кои е најавено дека ќе им се постави прашање.

Претседателот на Собранието, Џафери ги закажа и продолженијата на 8-та седница на која треба да се расправа за заменици на генераланиот секретар и на 12-тата седница, на која се останати два закони на опозицијата.