Европа парализирана од снежно невреме, илијадници домаќинства без електрична енергија

Снежните наноси низ поголемиот дел од Европа предизвикаа проблеми во сообраќајот во неколку земји. На поголемите аеродроми во Белгија и во Германија беа откажани летовите. Поради дебелата покривка или голомразица е блокиран и патниот сообраќај. Граѓаните се револтирани бидејќи им се нарушува секојдневната рутина и обврските не ги завршуваат навреме.

„Катастрофа! Времево е лошо. Заглавени сме, а на работа требаше да сум во 10 часот. Сега е 10 и пол, и уште сме блокирани.“

„Точно е дека ќе беше полесно да возам во тунелот, но ќе беше проблем да излезам. Мора да сме трпеливи.“

„Денеска паднав два пати и за малку ќе ме удреше автомобил на пешачкиот премин додека одев на работа. 5 сантиметри снег не е големо количество, но ги нервира сите.“

Во 32 области во Франција, е прогласена вонредна состојба. Силниот ветер го прекина снабдувањето со електрична енергија на илјадници домаќинства. Предупредување за опасност од лавина е издадено во скијачките центри на француските Алпи поради снежната покривка со дебелина од еден метар измерена на надморска височина од 2000 метри.

Снежната бура предизвика хаос и во северниот дел на Италија.  Со проблеми во сообраќајот се соочуваат и Холанѓаните. Издадено е предупредување и за „екстремна опасност“. Властите ги советуваат граѓаните да не го користат ни железничкиот сообраќај доколку не е неопходно.

„Ме пратија на неколку места. На перон 18, па на 21, па потоа на 12. Не е добро. Кога влеговме сите, возот воопшто не тргна. Па повторно ни рекоа да излеземе.“

Слична е состојбата и во Обединетото Кралство каде што поради снежните врнежи се затворени и училиштата во одредени региони.

Маја Филдишев