Граѓаните нема да ги платат калориметрите

Новиот Закон за енергетика предвидува инсталирање калориметри со кои ќе се мери потрошувачката на топлинска енергија во становите, но целосна дезинформација е дека трошокот ќе падне на граѓаните, изјави вицепремиерот Кочо Анѓушев. Тој најави дека законот и позаконските акти ќе бидат навреме донесени, а новата регулатива најверојатно ќе се применува од 1 јануари 2019-та. Се бара најдобриот начин за финансирање на овој трошок и во игра се неколку модалитети, рече Анѓушев.

„Разговараме со повеќе институции. Би ги споменал Хабитат, овој Зелен климатски фонд, за да обезбедиме средства тоа да биде направено од тие финансиски извори, а не на товар на граѓаните на Р. Македонија“, изјави Кочо Анѓушев, вицепремиер за економски прашања.

Коментирајќи го градењето нови регионални гасоводи Анѓушев изјави дека интерес за Македонија не е приклучување кон гасоводот „Турски тек“ затоа што тој ќе пренесува природен гас од истиот извор. Овој енергетски проект, според него, не е регионално прифатен.

„Мислам дека Македонија има интерес да се приклучи на ТАП и да направи алтернатива во снабдувањето со гас. Односно да се приклучи на алтернативните извори на гас, кои што доаѓаат од Азербејџан и од терминалите за природен гас во Грција“, смета вицепремиерот Анѓушев.

На овој начин би се обезбедиле повеќе извори на снабдување и ќе се зголеми конкурентноста во земјава, што не се постигнува со приклучување кон „Турски тек“, појасни Анѓушев, говорејќи за обезбедување алтернативни извори на снабдување на потрошувачите со природен гас. Најважно е да се обезбеди сигурно снабдување со гас на државата и конкуретност на цените, изјави вицепремиерот за економски прашања.

Свето Николовски