Спасовски го осуди нападот врз полицаецот, ВМРО-ДПМНЕ обвини за полициска бруталност

Еден повреден полицаец и едно приведено лице е епилогот од вчерашниот протест на ВМРО-ДПМНЕ на граничниот премин Табановце. За време на блокадата на преминот дошло до туркање меѓу полицијата и членовите на ВМРО-ДПМНЕ.

Во полицискиот билтен е наведено дека 42-годишно лице од Куманово се доближило до кордонот полицајци и удрил еден од нив во пределот на левото око. Полицаецот бил хоспитализиран, а човекот кој го удрил бил уапсен. Му се заканува пријава за напад врз службено лице, при вршење работи на безбедноста. Атакот врз полицаецот е напад врз државата, изјави министерот за внатрешни.

Од протестот пред Кумановскиот суд пак, ВМРО-ДПМНЕ побара уапсениот веднаш да биде ослободен. Рекоа дека е нивни активист, а настанот кај Табановце го окарактеризираа како невидена полициска бруталност. ВМРО-ДПМНЕ најави дека и следниве денови ќе блокира по еден граничен премин во државата.

Од опозициската партија тврдат дека условите во Истражниот затвор- Скопје се катастрофални. Притворените лица се држат во ќелии на температура под нулата со само два часа греење. Притворените во демократска држава во цивилизирана Европа се подложени на изживување и на методи како во логори од минатиот век, велат од ВМРО-ДПМНЕ.

Миле Ристески