Проект за вклучување на младите со инвалидитет во спортот
Спортот не е резервиран само за здравите лица. Луѓето со инвалидност имаат многу поголема потреба за тоа. Долготрајното седење и физичката неактивност бараат спортска рекреација и рехабилитација, за да се намали ризикот од разни болести. Преку проекти младите лица со инвалидитет се вклучуваат во спортот. Програмата трае до крајот на јуни годинава.
Луѓето со инвалидитет се изложени на долготрајно седење и физичка неактивност. Овој начин на живот ја наметнува потребата од спортска рекреација и рехабилитација. Така ќе се намали ризикот од разни болести, како што се кардиоваскуларните и респираторните заболувања – советуваат професори.
„Основната цел на спорската рекреација е одржување и подобрување на здравствената состојба. Што подолг и независен живот. Се надевам дека со повеќе вакви проекти ќе им овозможиме на овие лица да ја достигнат оваа цел“, изјави проф. д-р Горан Никовски, Факултет за физичко образование, спорт и здравје.
Македонската национална федерација за спорт и рекреација на инвалидите – македонски Параолимписки комитет, преку проекти ги вклучуваат младите со инвалидитет во спортот. Оттаму велат, спортот дава можност за поголема социјалнa вклученост во општеството.
„Таа активност целосно го ангажира лицето со инвалидност, ја менува неговата емоционална состојба, заборава на својата инвалидност, се појавува самостојност, самодоверба и истрајност. Тоа е она што ние треба да го потикнеме кај младите лица со инвалидност бидејќи од нив очекуваме да се вклучат во сите пори на општеството“, изјави Бранимир Јовановски- проект-менаџер.
Проектот „Променете го вашиот начин на размислување – спорт за сите“ трае 18 месеци, до крајот на јуни годинава.
Андријана Атанасовска