Димитров ќе учествува на Светскиот економски форум во Давос

Министерот за надворешни работи Никола Димитров од 24 до 26 јануари, на покана од претседателот на Светскиот економски форум (СЕФ) и член на Управниот одбор, Борге Бренде, ќе учествува на 48-от годишен состанок на СЕФ, што ќе се одржи во Давос, Швајцарија.

Делегацијата од Република Македонија ќе ја предводи премиерот Заев, кој е предвидено да се обрати во рамки на неколку сесии на Форумот. На маргините на Форумот, премиерот и министерот се очекува да имаат средби со повеќе свои колеги, со високи претставници на ЕУ, како и со други високи претставници од светската политичка и бизнис елита, соопшти МНР.

Главната тема на Форумот ќе биде „Креирање заедничка иднина во поделениот свет“. „Иднината на Европа“ исто така ќе биде во центарот на овогодишниот состанок на СЕФ, а Димитров е поканет како дискутант на неформалниот собир на светските економски лидери на темата „Идентитет, интеграција и миграција“.