Претседателот Иванов во официјална посета на Турција

Само со отворен ум младите ќе можат да размислуваат надвор од шаблоните, да изнаоѓаат нови, иновативни решенија на патот до индивидуалниот и колкетивниот успех. Сакаме да изградиме лидери со вистински вредности и интегритет, истакна претседателот Ѓорге Иванов на Светскиот форум на бизнис ангели, што се одржува во Истанбул.

Посочувајќи ја Школата за млади лидери, чиј е основач, шефот на државата им порача на присутните да се вклучат кон овој потфат, преку инвестирање на своето знаење, време и финансии, во идните општествени лидери на Македонија, Балканот, Европа и светот. Наша одговорност е, вели Иванов, да ги подготвиме оние кои доаѓаат после нас, да бидат морални и етички лидери со карактер, интегритет, понизност, фокус на луѓето, одговорност, храбро и мудро да се соочуваат со предизвиците.

„Стана популарно да се вели дека не е важно дали некој политички или бизнис лидер е морален или не, се додека добро ја извршува работата. Способноста, а не карактерот, е она што е важно. Но, прагматизам без морал води кон краткорочни решенија со долгорочно штетни последици. Лидери без морал се дел од проблемот, а не од решението“, нагласи македонскиот претседател Иванов.

На форумот, бизнис фелата сподели мислења, ставови и искуства, истражувања. На исто место се спојуваат младите луѓе со квалитетни идеи и претприемачи, сопственици на старт- ап бизниси, каде со договараат со ангел инвеститор, да инвестираат во нивните бизнис проекти.

За прв пат на „Бизнис ангел“ настанот течат пет симултани самити за различни инвеститори- за претприемачи, за инструменти за финансирање, за социјално претприемништво и ИТ секторот.

Во рамките на Светскиот форум на Бизнис- ангели, на претседателот Ѓорге Иванов му беше доделена награда за светско лидерство. Проектот „Школа за млади лидери“ е прогласен за најдобар социјално одговорен проект во Европа за 2017-та година.

Наташа Гркова- Петрушевска, специјален известувач од Истанбул за МРТ