Обвинителството ќе ги истражува причините за загинувањето на планинарите на Кајмакчалан
Во соопштението се вели дека надлежен јавен обвинител издал наредба до Секторот за внатрешни работи Скопје – единица за насилен криминал, за да се извршат проверки во Федерацијата на планинарските спортови на Македонија...
Основното јавно обвинителство Скопје постапува за расветлување на настанот на планинскиот врв Кајмакчалан, во кој животот го загубија двајца македонски планинари. Во соопштението се вели дека надлежен јавен обвинител издал наредба до Секторот за внатрешни работи Скопје – единица за насилен криминал, за да се извршат проверки во Федерацијата на планинарските спортови на Македонија во однос на тоа кој, кога и како ја организирал планинарската експедиција, кои се потребните услови за таква организација и дали тие биле исполнети, како и други околности.
Истовремено е издадена наредба да се направат проверки и во Планинарското друштво Трансверзалец- Скопје, нивните акти и одлуки врз основа на кои се организираат планинарските експедиции, потребните услови што треба да се исполнат, како и околностите под кои се спроведувало искачувањето на Кајмакчалан.
По наредба на надлежниот обвинител треба да бидат обезбедени и листинзите на појдовни и дојдовни повици од мобилните телефони на починатите планинари,се вели во соопштението на Основното јавно обвинителство- Скопје.