Светска банка: 231 илјада нови работни места во земјите од Западен Балкан минатата година

Зголемувањето на вработеноста во текот на минатата година за 3,9 проценти доведе до создавање 231 илјада нови работни места во шесте земји од Западен Балкан- се вели во извештајот „Трендовите на пазарот на трудот на Западен Балкан 2018“, објавен од Светска банка и Виенскиот Институт за меѓународни економски студии.

Невработеноста, исто така, се намали од 18,6 на 16,2 проценти, достигнувајќи историски ниски нивоа во некои од земјите- се вели во извештајот.

Косово е лидер во регионот, со зголемување на вработеноста од 9,2 проценти, по што следуваат Србија со 4,3 насто, Црна Гора, Албанија, Македонија со 2,7 насто и Босна и Херцеговина со 1,9.

Според банката, и покрај напредокот, ниските стапки на активност, особено кај жените и младите, заедно со високите стапки на долгорочна невработеност и проблемот со неформалната работа, продолжуваат да наметнуваат предизвици врз одржливиот економски раст во регионот.