Димитров се надева на прогрес во разговорите за името

Пред средбата со Коѕијас во Охрид, шефот на дипломатијата Димитров изјави- очекувам тешки разговори за разликата за името. На маса ќе бидат разликите што останаа меѓу двете страни, по размената на нацрт- спогодбите на последната средба со посредникот Нимиц во Виена.

„Прашањето е толку важно што по дефиниција сите рунди разговори се тешки, така што се разбира очекувам темелни разговори. Се надевам на прогрес. Мислам дека однесувањето и на Република Македонија и на нашите соседи од Грција во однос на процесот сигнализира дека процесот е во една деликатна фаза и фокусирани сме токму на овие разговори“, истакна шефот на дипломатијата Димитров по средбата со украинскиот министер за надворешни работи Павло Климкин.

На трилатералната средба во Охрид, Димитров, Коѕијас и шефот на украинската дипломатија Климкин, треба да разговараат за натамошната соработка. Исто така, Македонија и Ураина ќе споделуваат искуства за интеграцијата во ЕУ и во НАТО.

„Ја сметаме Македонија за многу важен партнер, не само билатерално, туку важен партнер на Балканот. Ние заедно одиме кон Европската унија и НАТО“, рече Павло Климкин, министер за надворешни работи на Украина.

Ќе се бара и правно решение за одземањето на концесијата на украинската фирма „Сардич“ за рудникот „Казандол“ крај Валандово, изјавија шефовите на дипломатиите Димитров и Климкин.

Во наредниот период ќе се зголеми економската соработка, но и соработката во ОБСЕ, ОН и меѓу двете ресорни министерства. Годинава реципрочно и трајно се укинуваат визите за македонските и за украинските државјани, по што би следело и авионско, директно поврзување меѓу Киев и Скопје.

Ирина Гелевска