Власта и опозицијата гласаа за реформските закони
Собранието ги изгласа измените на Законот за заштита на сведоци со 86 гласови „за“. Со двотретинско мнозинство е донесен и Законот за формирање на Оперативно- техничката агенција. Пратениците дадоа зелено светло и на Законот за следење на комуникациите...
Со 86 гласа „за“ Собранието го донесе Законот за заштита на сведоците, што го побара СЈО. Од опозициската ВМРО- ДПМНЕ посочија дека со прифаќањето на 11 нивни предлози на работните групи, текстот на Законот е подобрен во насока на онезвозможување на селективна правда.
Со глас повеќе, народните избраници дадоа зелено светло за формирање на Оперативно- техничката агенција. И од опозицијата и од мнозинството се надеваат дека Агенцијата ќе стави крај на незаконското следење на комуникациите, ќе го зајакне безбедносниот систем и ќе овозможи гарантирање на слободите и правата на граѓаните на кои, пак, на два пати им се случуваа големи афери со прислушувања.
Со двотретинско мнозинство беше донесен и Законот за следење на комуникациите. Поради дополнителни усогласувања меѓу власта и опозицијата, Собранието дополнително ќе решава за другите реформски закони.
Фиљана Кока