Земан: Во Чешка произведен и тестиран нервниот агенс „Новичок“

Претседателот на Чешка, Милош Земан тврди дека неговата војска го развила и тестирала нервниот агенс „Новичок“. Информацијата ја толкува врз основа на извештај на воено-разузнавачка агенција.

Според втор извештај на Безбедносно-информативна служба, бил тестиран нервен отров познат како А230, кој бил уништен веднаш по тестирањето.

Претходно, руски официјални лица изјавија дека Чешка е една од четирите земји за кои се сомневаат дека е извор на нервниот агенс кој беше искористен при обидот за убиство во Солсбери на поранешниот двоен агент Сергеј Скрипаљ и неговата ќерка Јулија.