Сто и петнаесет години од загинувањето на Гоце Делчев

Денеска се одбележуваат 115 години од смртта на револуционерот Гоце Делчев, кој на денешен ден во 1903-та година беше убиен од турската војска во село Баница, на пат кон Сер. Делегација на Владата на Република Македонија, предводена од премиерот Зоран Заев ќе оддаде почит и ќе положи свежи цвеќина на гробот на Гоце Делчев во црквата Свети Спас во Скопје.

Визионерот кој пред повеќе од еден век го разбра светот како поле за културен натпревар на народите е роден на 4-ти февруари 1872-ра година во Кукуш, во семејството на Султана и Никола. Се школувал во гимназијата во Солун и на Воената академија во Софија. Учителствувал во Штип, а како член на Централниот комитет на ТМОРО работел на создавање мрежа на бази, комитети и комитски чети на Организацијата.

Учествувал на Солунскиот конгрес на ВМРО (1896), а до 1901 година бил задграничен претставник на ВМРО во Софија.

По убиството, неговите посмртни останки првин се чувале во Баница, до 1917 година, кога биле пренесени во Ксанти, а потоа во Софија. До 1923 година, ковчежето со коските се чувало во домот на Михаил Чаков. Останките на Делчев на 11-ти октомври 1946 година биле пренесени во црквата „Свети Спас“ во Скопје.