Се прават проценки колку ќе чини автопатот Кичево- Охрид
Министерството за транспорт и врски и Агенцијата за државни патишта ги прават првичните проценки за тоа колку ќе чини изградбата на автопатот Кичево- Охрид. Претходно, преку собраниска процедура, ќе побараат дозвола за префрлање на искористувањето на преостанатите 220 милиони евра од планираните, на потребните ставки. До крајот на идниот месец се очекува да почне електронската наплата на патарините...
За еден месец се очекува првичната проценка за тоа колку дополнително ќе чини изградбата на автопатот Кичево- Охрид. Од ресорот велат дека се проектираат клучките, споредните патишта и тунелот, кои не биле предвидени со проектот. Надлежните ќе бараат од Парламентот пренамена во ставките за преостанатите 220 милиони евра, заем од Ексим банката. Според првиот човек на Јавното претпријатие за државни патишта во завршна фаза е и експропријацијата.
Министерот Сугарески очекува од август градежна експанзија во патната инфраструктура, кога почнува изградбата на над 60 експресни патни правци, вредни околу милијарда денари. Посочува дека тоа ќе влијае позитивно на растот на бруто- домашниот производ.
До крајот на септември се очекува да завршат градежните активности на автопатот Миладиновци- Штип. Надлежните најавуваат можни заштеди. Од ресорот посочуваат дека се интензивираат и активностите за изградба на пругата Крива Паланка- Бугарска граница, а до крајот на годината се очекува да заврши и изградбата на железничката линија Битола- Каменица. До крајот на јуни ќе заврши инсталирањето на електронскиот систем за наплата на патарините.
Дијана Ценевска