Собранието го ратификуваше договорот со Грција

Собранието на Република Македонија го усвои Законот за ратификација на договорот за решавање на 27- годишниот спор за името со Грција. Договорот беше ратификуван со 69 гласови „за“, без против и воздржани.

Пратениците на опозициската ВМРО-ДПМНЕ не присуствуваа на седницата. ВМРО-ДПМНЕ најави дека ќе побара толкување од Венецијанската комисија за утврдување на правната природа на договорот.

Договорот означува почеток на крајот на неизвесноста за Македонија и претставува достоинствено и прифатливо решение за двете страни, со кое засекогаш се потврдува македонскиот идентитет и јазик, нагласи премиерот Зоран Заев во обраќањето пред пратениците во Законодавниот дом.

Имаме договор со јасно обележје на нашиот македонски идентитет, на нашиот македонски јазик, за век и векови. Никому ништо не сме му подариле ниту некој ни земал нешто кога се договоривме за географска одрдница. Ова е храбар чекор во интерес на иднината на граѓаните и нашите деца, за спокојна иднина. Да ги отфрлиме манипулациите и излолацијата и да му понудиме шанса на договорот, рече Заев.

Нагласи дека договорот е поддржан од сите меѓународни партнери, ги отвора портите на Македонија кон европска иднина.