Три лица осомничени за тројното убиство на семејство во Дебар

Основното јавно обвинителство од Гостивар нареди спроведување истражна постапка за тројното убиство. Со неа се опфатени тројца, меѓу кои е и 28-годишната ќерка на убиените од семејството Поцеста во Дебар. Таа е првоосомничена за кривичното дело „убиство“.

„За другите двајца осомничени, 31-годишен маж од Гостивар и 62-годишен жител на Дебар, постои сомнение дека ѝ помагале во извршувањето со што сториле кривично дело – убиство од чл.123 ст.3 во врска со чл.24 од кривичниот законик“, соопштува Обвинителството.

Сите тројца заработија триесет дневен притвор. Обвинителството информира дека истражната постапка продолжува до целосно расветлување на настанот и обезбедување материјални докази.

Грозоморното убиство на тројцата членови на семејството Поцеста беше извршено во нивниот дом додека спиеле. Во јавноста првично се шпекулираше дека е извршено од роднина поради нерасчистени имотно- правни односи. Истрагата покажа дека нивната постара ќерка од Италија, Блерта Поцеста била во Дебар и потоа заминала, за повторно да се врати кога ја повикале роднините заради смртта на нејзините родители и помалата сестра.

Фиљана Кока