Хашим Тачи повика да се гласа на референдумот

Претседателот на Косово, Хашим Тачи во посета на Македонија. На платото пред Владата пречекан од премиерот Заев, со кого имаше тет-а-тет средба, по што следуваше состанокот на делегациите од двете страни.

Оцениле дека меѓу Македонија и Косово нема отворени прашања, но оти соработката треба да се продлабочи преку подобра инфраструктурна поврзаност, изградба на автопатот Приштина- Скопје, и преку формирање мешовит комитет. Наскоро ќе се одржи заедничка владина седница.

Заев рече дека Македонија посакува позитивно решение од дијалогот меѓу Косово и Србија, а Тачи даде поддршка за решавањето на спорот со Грција.

„Косово ве поддржува да се движите напред кон зачленувањето во НАТО и ЕУ. Ги повикувам со мојот скромен авторитет сите граѓани на Македонија да учествуваат и да гласааат „за“ на референдумот. Мислам дека ова е историски момент што би требало да се искористи“, рече Тачи.

Тачи се осврна и на односите помеѓу Белград и Приштина, посочувајќи дека нема да биде лесен процесот да се донесе конечна историска одлука и да се затворат прашањата на Косово и Србија, но, рече, затоа тука е дијалогот.