Шест концерти на 22-от „Блуз и соул фестивал“

Дваесет и вториот „Блуз и соул фестивал“ во организација на Дирекцијата за култура и уметност-Скопје ќе се одржува три дена претстојниот викенд во пивница „Стар Град“ во Старата чаршија. Изведувачите годинава се од Македонија, Србија, Белгија и Данска и се по избор на Иво Солдатовиќ кој втора година е селектор на фестивалот.

„Блуз и соул“ в петок ќе го отвори „Crossroad Blues Band“, еден од најпознатите македонски блуз-бендови кој на сцената опстојува повеќе од две децении. Првата фестивалска вечер ќе биде заокружена со четиричлениот белгиски состав „Shakedown Tim & The Rhythm Revue“ основан од Тим Шејкдаун, кој свири динамична комбинација на блуз, џамп-блуз и буги, до свинг и ритам и блуз.

Втората фестивалска вечер, в сабота ќе ја отвори квинтетот „The Gamblers“ од Сремска Митровица, Србија. Станува збор за легендарен блуз- состав од 1984 година и оттогаш ја освојуваат регионалната блуз-сцена и настапуваат на престижни фестивали низ Европа.

Саботната блуз- вечер ќе заврши со настап на „Chris Grey & The BlueSpand“ од Данска, трио  на Крис Греј кој е блуз- ѕвезда во Европа и светот.

На годинашниот фестивал ќе гостува уште еден српски блуз-бенд – петчлениот „The Blueshammer“ од Нови Сад кои прават атрактивни концерти со тексашки блуз и јужњачки рок и фанк. Тие ќе настапат в недела, а по нив фестивалот со диџејски сет ќе го затвори Васја Ивановски, долгогодишен радиоводител и поранешен селектор на „Блуз и соул фестивалот“.

Концертите на тридневниот „Блуз и соул“ ќе почнуваат од 21 часот. Влезниците за секоја вечер се по 200 денари или 500 денари за блок- влезници сите три вечери.