Месечно по 150 повреди на работно место, се бараат законски измени
Речиси 150 лица месечно се здобиваат со тешки повреди на работното место. Дел од нив завршуваат фатално. Најмногу повреди има во секторот земјоделство. Респираторните и алергиите се најчестите заболувања меѓу работниците. Бизнисот иницира измени на Законот за безбедност и здравје при работа...
150 работници месечно се здобиваат со тешки повреди, дел се фатални. Бизнисот бара измени на Закон за безбедност и здравје при работа за на стручните лица во компаниите да им се даде поголема улога, да се прецизира одговорноста на работодавачот и на лицето задолжено за безбедност и здравје при работа.
„За жал најголемо влијание и улога во безбедноста и здравјето при работа добија надворешните стручни правни лица кои во суштина некои од нив не ни влегле во компаниите, а прават изјави за безбедност и прават проценки на ризик. Ние сметаме дека многу поголемо значење треба да се стручните лица вработени во компаниите кои секојдневно се на работните места со работниците и секојдневно се опкружени во таа околина која треба да ја анализираат и да ги проценат ризиците“, изјави Јован Димитров, Организација на работодавачи.
Важна улога во имплементирањето на законот има Државниот инспекторат, затоа тој треба да се насочи, охрабри и зајакне, велат од Институтот за медицина на труд.
„Државниот инспекторат за труд мора да ги зајакне капацитетите. Тоа е задача на Министерството за труд и социјална политика. И во претходниот извештај на Европската комисија тоа беше една од клучните забелешки“, вели Јована Бислимовска, Институт за медицина на труд.
Респираторните заболувања, оштетувањата на слухот, алергиите и заболувањата на кожата се најчестите заболувања на работните места. Најмногу повреди има во секторот земјоделство.
Андријана Атанасовска