Украина воведе воена состојба
Итен состанок НАТО- Украина поради ескалирањето на кризата во Црноморието и Азовското море. Руската морнарица заплени украински воени бродови откако отвори оган, тврдат во Москва. Повредени се шест украински морнари. Киев прогласи воена состојба, Москва чека на Советот за безбедност на ООН да одржи итна седница...
Ден по инцидентот во Азовското Море, кога Русија заплени три украински брода со употреба на оружје, состојбата во мореузот е мирна, но растат тензиите на политичко ниво. Украина воведе воена состојба кoja се очекува да трае 60 дена, а Русија побара итна седница на Советот за безбедност на Обединетите нации.
Украинскиот претседател Порошенко оценува- украина не планира да војува со никого и дека прогласувањето воена состојба не значи прогласување војна. Побара од Русија да ги ослободи морнарите и да ги врати бродовите.
„Воената состојба е исклучиво за зајакнување на одбранбените способности на државата во услови на зголемување на агресијата и акциите од страна на Руската Федерација. Тоа не значи дека одбиваме политичко и дипломатско решение за ослободување на украинската територија. Ќе продолжиме да ги следиме сите меѓународни обврски, вклучувајќи го и договор од Минск“, изјави Петро Порошенко, претседател на Украина.
Рускиот министер за надворешни работи, Сергеј Лавров изјави дека инцидентот е дефинитивна провокација од страна на Украина.
„Нема сомневање дека впловувањето на украинските бродови во руските територијални води е направено намерно и под директна наредба од раководството“, рече Сергеј Лавров, министер за надворешни на Русија.
Во близина на Амбасадата на Русија во Киев, пред која во текот на ноќта се собраа голем број граѓани, бил запален автомобил со руски регистерски таблички.
Државниот заменик министер за надворешни работи на Русија, Григориј Карасин изјави дека вчерашните инциденти се провокација од Киев за да се разниша Украина со објавување воена состојба, мобилизирање на анти- руско настроениот запад и заострување на санкциите кон Москва.
Министерството за одбрана на Украина возврати со највисока борбена готовност на војската. Министерството побара нови, засилени санкции, а НАТО соопшти дека ја следи ситуацијата и дека е во контакт со украинските власти.
Во меѓувреме Турција изрази загриженост за инцидентот, додека Полска го осуди агресивното однесување на Русија.
Тензиите на релација Москва- Киев се засилија откако бродови на руската крајбрежна стража запленија три украински брода во близина на Крим кои се обиделе да преминат преку мореузот Керч. Во инцидентот беа ранети шест украински војници. Москва, која тврди дека и украинските бродови претходно одговориле оган, соопшти и дека е покрената руската авијација со патроли на авионите Сухој-25.
Марина Ристова