Енергетската ефикасност ќе ја намали енергетската сиромаштија

Целта на Вториот парламентарен форум за Југоисточна Европа посветен на енергетската ефикасност и на климата е да се поттикнат парламентарците оваа проблематика да ја стават високо на своите политички агенди. Организаторот, Отворениот регионален фонд на ГИЗ, очекува фокусот да биде на најдобрите парламентарни практики за енергетска ефикасност и креирање политики за намалување на енергетската сиромаштија во регионот.

Според истражувањата 50 милиони луѓе во ЕУ се погодени од енергетската сиромаштија, од кои најголем дел во: Романија, Бугарија и во Хрватска, додека проблемот е далеку поизразен во земјите од Западен Балкан.

„За да се реши проблемот со енергетската сиромаштија потребна е токму енергетската ефикасност. Впрочем тоа е единствената мерка која што истовремено ги намалува сметките за енергија и што веднаш ги подобрува условите за живеење. Во ЕУ 50 милиони луѓе се засегнати со енергетската сиромаштија, а најголем дел се во: Романија, Бугарија и во Хрватска. Но во регионот овој проблем е далеку поизразен“, изјави Славица Робиќ, експерт за енергетска ефикасност од Хрватска.

Кога се говори за кредитирање инвестиции во енергетска ефикасност засега од регионот најдалеку е отидена Хрватска. Преку Фондот за енергетска ефикасност за вакви инвестиции се даваат од 40 до 60% неповратни средства.

Наша цел е да ги поврземе парламентите на регионално ниво, заеднички да ја застапуваат оваа тема, а кога ќе се вратат дома, во националните парламенти да работат на реализирање на договорените политики на енергетска ефикасност и намалување на енергетската сиромаштија, вели проект-менаџерот Јасна Секуловиќ.

„Темите кои што можеби не се толку високо на политичката агенда, како што се политиката на енергетската ефикасност и политиката на заштита, со помош на парламентарците во регионот на југоисточна Европа, да ги промовираме и таа тема да добие на значење“, изјави Јасна Секуловиќ- проект менаџер во ГИЗ.

Состојбите се менуваат и нашите парламентарци стануваат свесни за важноста на овие теми, вели Секуловиќ, споредувајќи ги денешните состојби во однос на 2011-та кога почна да функционира регионалниот фонд.

Свето Николовски