Заев: Македонија е подготвена да учествува во позитивните процеси во регионот
Македонскиот премиер Зоран Заев учествува на Самитот на Централно Европската Иницијатива што се одржува во Загреб. Учествуваат премиерите на Македонија, Хрватска, Унгарија, Бугарија, Албанија, Романија и Словачка, како и еврокомесарот Хан и претседателот на Европска банка за обнова и развој Чакрабарти...
Република Македонија е подготвена да продолжи да ги предводи позитивните процеси во регионот што носат стабилност и економски развој - изјави премиерот Зоран Заев на Самитот на шефови на влади на Централно Европската Иницијатива во Загреб, чијшто домаќин е премиерот на Република Хрватска, Андреј Пленковиќ.
Во фокус на Самитот се изградбата на стабилност, просперитет и унапредување на соработката меѓу државите во регионот, Европа и светот. Учествуваат претставници од 18 земји- членки, а на присутни се и еврокомесарот Јоханес Хан, претседателот на ЕБРД, Сума Чакрабарти, високи претставници на ОБСЕ и на Советот на Европа.
„Македонија е подготвена да ја продлабочи и прошири соработката во регионот, низ добрососедски односи, и во овој контекст, постигнавме големи резултати. Ова се случи благодарение на подготвеноста и чувството на одговорност на земјите и политичките лидери во регионот. Но, подготвени сме да работиме на долгорочните интереси на регионот“, рече премиерот Заев, соопшти владината прес- служба.
Тој ги посочил договорите со Бугарија и со Грција како важни во оваа насока и во обраќањето упатил благодарност до бугарскиот и до грчкиот премиер, Бојко Борисов и Алексис Ципрас, за придонесот во стабилизацијата на билатералните односи со Македонија, што придонесува и кон стабилизацијата во регионални рамки.
На Самитот, посебно е нагласена важноста на економското поврзување на државите како и придонесот на земјите во справувањето со мигрантската криза. Премиерот Заев, во врска со економската соработка, рече дека таа е важен сегмент од евроатланска интеграција на Македонија и на регионот.