Утре ќе започне дебатата за уставните амандмани

Наместо денеска, седницата на уставната комисија за последната фаза на уставните измени, презакажана за утре. Комисијата, како и собраниската седница, со други точки на дневен ред, што беа закажани за денеска, се одложени за утре поради тоа што голем дел од пратениците ќе бидат отсутни заради комеморативната седница и погребот на градоначалникот на Охрид, Јован Стојаноски, кој ненадејно почина на 48-годишна возраст во саботата.

Ова е трета и последна фаза од постапката за промена на Уставот, согласно Договорот од Преспа. Уставната комисија треба да ги разгледува четирите нацрт-амандмани, и Извештајот на Владата од јавната дискусија за нацрт-амандманите, а потоа како втора точка е ставен Предлог- уставен закон за спроведување на амандманите на Уставот на Република Македонија.

Четирите амандмани од 33-от до 36-от опфаќаат промена на името на земјата во Република Северна Македонија, промена на преамбулата со вклучување на правните одлуки на АСНОМ и Охридскиот договор, гарантирање на суверенитетот на соседните држави и наместо малцинство во соседството, да се употребува терминот дијаспора.