Комеморативна седница во Охрид по повод смртта на градоначалникот Јован Стојаноски
Денеска на градските гробишта во Охрид беа погребани посмртните останки на градоначикот Јован Стојаноски. На погребот покрај членови на семејството присуствуваа голем број граѓани, како и претставници на државниот врв, политичките партии, делегации на општини од земјата и од збратимените градови од регионот...
Во Охрид денеска е ден на жалост. Градот достоинствено се прости од градоначалникот Јован Стојаноски, кој почина на 15-ти декември. На комеморативната седница што се одржа по тој повод, на која присуствуваа членови на семејството на Стојаноски, министри, пратеници, градоначалници, советници и граѓани, говорејќи за ненадејната смрт на првиот човек на Охрид, премиерот Зоран Заев рече дека тоа е голема загуба за академската заедница, за државата, општината и партијата СДСМ, бидеќи тој низ годините наназад дал огромен придонес со своето посветено работење.
„Остави траги и предизвикуваше почит која секогаш ќе се памети. Јован беше колега, пријател и голем професионалец. Како градоначалник беше посветен на својата визија Охрид да биде вистинска европска културна и туристичка претстолнина“, рече премиерот Зоран Заев.
Во името на Собранието на Република Македонија и Советот на општина Охрид од Стојаноски се простија Томислав Тунтев и Живка Ангелоска.
„Ми рече ајде да гоменуваме светот, ајде реков да го менуваме, како, тешко е. Рече- најпрво ние ќе се смениме самите, па ќе ги смениме тие околу нас, па ќе го смениме Охрид и Македонија и ќе го смениме светот“, изјави пратеникот Тунтев.
„Советот и локалната самоуправа изгубија лидер, колега, го изгубија својот едноставен и голем Јован“, додаде Живка Ангелоска, Претседател на Совет на општина Охрид.
Комеморативна седница се одржа и на Факултетот за туризам и угостителство каде што покрај колегите од својот професор емотивно се збогуваа и студентите. За нив, како што беше речено, тој бил пример за тоа како треба да се борат за вистината, да бидат искрени и достоинствени.
Сашо Нелоски