Најмалку 43 жртви во нападот во Кабул

Најмалку 43 луѓе загинаа, а 25- мина се повредени во напад врз административни згради во Кабул, во кои се сместени и Министерството за јавни работи и канцеларијата на Министерството за труд, социјални работи, маченици и инвалиди.

Тројца од напаѓачите се убиени во операција на авганистанските безбедносни сили, кога се ослободени 357 луѓе, кои екстремистите ги држеле како заложници. Нападот траел осум часа, а почнал со експлозија на автомобил, по што напаѓачите отвориле оган. На локацијата биле забележани бомбаш-самоубиец и тројца мажи вооружени со пушки и експлозиви.

„Еден од осумтемина бомбаши самоубијци се разнесе на вратата. Другите влегоа во канцеларииите по што почна масакрот. Беа на вториот и третиот кат и убија многу луѓе“, изјави Калилур Рахман, службеник во Одделот за маченици и инвалиди.

„Се искачија на повисоките катови и стрелаа кон вратите и во сите што им се најдоа на патот“, вели Абдул Џалил, службеник во Одделот за маченици и инвалиди.

Авганистанската влада индиректно ги обвини Талибанците за нападот, а ниту една група официјално не презела одговорност.

Портпаролот на авганистанското Министерство за здравство соопшти дека полицијата и медицинските тимови се уште трагаат по тела на местото на нападот.

Ова е 22-иот напад оваа година во Кабул, каде што загинаа над 510 луѓе, а се повредени повеќе од илјада. 

Марина Ристова