Смртоносни торнада на југоистокот на САД

Локалните власти очекуваат раст на бројот на жртвите поради материјалната штета и големиот број урнати објекти. Над 4.000 семејства во Алабама останаа без електрична енергија. Операциите на спасувачките екипи беа привремено запрени поради ноќта и непрегледноста на теренот.

Џеј Џоунс - Шерифот на округот Ли

Штетата спаѓа во категорија на катастрофа врз основа на проценката она што го видовме. Потрагата по преживеани продолжува. Имаме и пријавени исчезнати лица. Неколку жители се префрлени во болница. Дел од нив се со сериозни повреди. Во моментов сме фокусирани на операцијата за спасување и пребарување.

Најсилното торнадо ја погоди областа околу Бјурегард. Американската метеоролошка служба го вброи во категоријата ЕФ-3, што значи дека брзината на ветрот достигнала 266 километри на час.

Предупредување за невреме е издадено во Џорџија, Флорида и Јужна Каролина. Локалните и федералните власти ги советуваат граѓаните да бидат внимателни.

Џо Перкс - Пожарникар

Внимавајте на оштетените далноводи, не излегувајте на патиштата доколку не е неопходно.

По серијата торнада, метеоролозите најавуваат ниска температура за наредните денови. Потенцираат дека драстичната променливост на временските услови е вообичаена за март, особено на југоистокот на Соединетите Американски Држави.

Во 2011 година, во серија од шеесетина торнада во Алабама загинаа над 230 луѓе.